خروج 3

¹اور موسیٰ اپنے سُسر یترون کاہنِ مِدیان کی بھیڑ بکریاں چَرایا کرتا تھا۔ ایک دن وہ ریوڑ کو بیابان کے پار ہانک لے گیا اور خدا کے پہاڑ حورب تک جا پہنچا۔

²وہاں خداوند کا فرشتہ ایک جھاڑی کے بیچ آگ کے شعلے میں اُس پر ظاہر ہوا۔ اُس نے نگاہ کی تو دیکھا کہ جھاڑی آگ سے جل رہی ہے پر بھسم نہیں ہوتی۔

³موسیٰ نے کہا میں ذرا جا کر یہ عجیب منظر دیکھوں کہ جھاڑی کیوں نہیں جلتی۔

⁴جب خداوند نے دیکھا کہ وہ دیکھنے کے لیے مُڑا تو خدا نے جھاڑی میں سے اُسے پکارا اور کہا موسیٰ! موسیٰ! اُس نے کہا میں حاضر ہوں۔

⁵اُس نے کہا اِدھر نزدیک نہ آ۔ اپنے پاؤں سے جوتی اُتار ڈال کیونکہ جس جگہ تُو کھڑا ہے وہ مقدس زمین ہے۔

⁶پھر اُس نے کہا میں تیرے باپ کا خدا، ابراہام کا خدا، اضحاق کا خدا اور یعقوب کا خدا ہوں۔ تب موسیٰ نے اپنا مُنہ چھپا لیا کیونکہ وہ خدا کو دیکھنے سے ڈرتا تھا۔

⁷خداوند نے کہا میں نے اپنی قوم کی مصیبت جو مصر میں ہے خوب دیکھی اور اُن کی فریاد جو بیگار لینے والوں کے سبب سے ہے سُنی ہے کیونکہ میں اُن کے دُکھوں سے واقف ہوں۔

⁸اور میں اُتر آیا ہوں تاکہ اُنہیں مصریوں کے ہاتھ سے چھڑاؤں اور اُس ملک سے نکال کر ایک اچھے اور وسیع ملک میں پہنچاؤں جہاں دودھ اور شہد بہتا ہے۔

⁹اور اب دیکھ بنی اسرائیل کی فریاد میرے پاس پہنچی ہے اور وہ ظلم بھی جو مصری اُن پر کرتے ہیں میں نے دیکھا ہے۔

¹⁰سو اب آ میں تجھے فرعون کے پاس بھیجوں تاکہ تُو میری قوم بنی اسرائیل کو مصر سے نکال لائے۔

¹¹موسیٰ نے خدا سے کہا میں کون ہوں کہ فرعون کے پاس جاؤں اور بنی اسرائیل کو مصر سے نکال لاؤں؟

¹²اُس نے کہا میں یقیناً تیرے ساتھ ہوں گا اور تیرے لیے یہ نشان ہوگا کہ میں نے ہی تجھے بھیجا ہے: جب تُو قوم کو مصر سے نکال لائے گا تو تم اِسی پہاڑ پر خدا کی عبادت کرو گے۔

¹³موسیٰ نے خدا سے کہا اگر میں بنی اسرائیل کے پاس جا کر کہوں کہ تمہارے باپ دادا کے خدا نے مجھے تمہارے پاس بھیجا ہے اور وہ مجھ سے پوچھیں کہ اُس کا نام کیا ہے تو میں اُن سے کیا کہوں؟

¹⁴خدا نے موسیٰ سے کہا میں ہوں جو میں ہوں۔ پھر کہا بنی اسرائیل سے یوں کہنا کہ میں ہوں نے مجھے تمہارے پاس بھیجا ہے۔

¹⁵خدا نے پھر موسیٰ سے کہا بنی اسرائیل سے یوں کہنا کہ خداوند تمہارے باپ دادا کے خدا نے، یعنی ابراہام کے خدا، اضحاق کے خدا اور یعقوب کے خدا نے مجھے تمہارے پاس بھیجا ہے۔ یہی ہمیشہ کے لیے میرا نام اور پُشت در پُشت میری یادگار ہے۔

¹⁶جا اور بنی اسرائیل کے بزرگوں کو جمع کر کے اُن سے کہہ کہ خداوند تمہارے باپ دادا کے خدا نے مجھ پر ظاہر ہو کر کہا ہے کہ میں نے تم پر اور جو کچھ تم سے مصر میں ہوا اُس پر نظر کی ہے۔

¹⁷اور میں نے کہا ہے کہ میں تم کو مصر کے دُکھ سے نکال کر کنعانیوں، حِتّیوں، اموریوں، فرِزّیوں، حِوّیوں اور یبوسیوں کے ملک میں پہنچاؤں گا جہاں دودھ اور شہد بہتا ہے۔

¹⁸اور وہ تیری بات مانیں گے، اور تُو اور بنی اسرائیل کے بزرگ مصر کے بادشاہ کے پاس جا کر اُس سے کہنا کہ خداوند عبرانیوں کے خدا نے ہم سے ملاقات کی ہے، سو اب ہمیں تین دن کی راہ بیابان میں جانے دے تاکہ ہم خداوند اپنے خدا کے لیے قربانی چڑھائیں۔

¹⁹اور میں جانتا ہوں کہ مصر کا بادشاہ تمہیں جانے نہ دے گا، ہاں زورآور ہاتھ کے بغیر بھی نہیں۔

²⁰سو میں اپنا ہاتھ بڑھاؤں گا اور مصر کو اپنے سب عجیب کاموں سے مارُوں گا جو میں اُس کے بیچ کروں گا۔ اِس کے بعد وہ تمہیں جانے دے گا۔

²¹اور میں اِس قوم کو مصریوں کی نظر میں مقبول کروں گا، سو ایسا ہوگا کہ جب تم روانہ ہو گے تو خالی ہاتھ نہیں جاؤ گے۔

²²بلکہ ہر عورت اپنی پڑوسن اور اپنے گھر میں رہنے والی مہمان عورت سے چاندی اور سونے کے زیور اور کپڑے مانگے گی، اور تم اپنے بیٹے بیٹیوں کو اُن سے آراستہ کرو گے۔ یوں تم مصریوں کو لُوٹو گے۔